wruqKq

Objectives

මේ වනවිට අප රට පත් වී ඇති තත්වය පිළිබඳ, අප සැම හොඳින් දනිමු. එමෙන්ම පසුගිය කාලය තුළ අප සිත් තුළ ඇති වූ දැඩි කලකිරීම් හේතුවෙන්, මෙවර පාර්ලිමේන්තු මැතිවරණයේදී, කිසිවෙකුටත් ඡන්දය නොදීමට අප බොහෝ දෙනෙක් තීරණය කර ඇත්තෙමු.
නමුත් එයින් සිදුවිය හැකි අනතුර ගැන ඔබ මොහොතක් සිතුවාද? එවිට මීටත් වඩා ඉතාම නුසුදුස්සන්, අඩු ඡන්දයෙන් පාර්ලිමේන්තුවේ හිස්තැන් පුුරවනු ඇත. ඉන්පසු රටට සිදුවිය හැකි දේ ගැන කිව යුතු නැත. බුද්ධියෙන් සිතන්න!
ඔබ රටට ආදරය කරන්නේ නම්, අනිවාර්යයෙන් ඔබේ ඡන්දය පාවිච්චි කළ යුතු වේ,
එහෙත් කාටද ? ?

  • මේ, එම ගැටළුව විසඳීමට අප දරනා ප‍්‍රයත්නයයි. මෙය කිසිදු පක්ෂයකට එරෙහිව කරනා අරගලයක් හෝ ඡන්ද කැඩීමක් නොව, හුදෙක්, කිසිවෙකු පිළිබඳ විශ්වාසයක් තැබිය නොහැකිව අතරමං වී සිටින ශ්‍රී ලාංකීය ජනතාවට යම් විසඳුමක් ඔවුන් අතරින්ම සෙවීමට ගත් උත්සාහයකි.
  • එහි පළමු පියවර වශයෙන්, ඔබ අප වෙනුවෙන් හඩ නැගීමට, රටේ දියුණුව ආරක්ෂාව වෙනුවෙන් බුද්ධිමත් තීරණ ගැනීමට, සුදුසු අය අප අවටින්ම සොයමු. විවිධ ක්ෂේත‍්‍රවල නිපුණත්වය ලබා ඇති, ක්‍රියාවෙන් ප‍්‍රතිඵල ගෙන ආ හැකි, දුෂිත නොවූ, මුදලට නොනැමෙන, දක්ෂ, සුවිශේෂ බුද්ධිමතුන් සොයා, අන්තර්ජාලය ඔස්සේ එක් රැස්කර, ජනතා වේදිකාවක් ඉදිරියට ගෙන්වමු. මෙම උත්සාහය අංග සම්පූර්ණ නොවනු ඇත. නමුත් අඳුරට සාප නොකරමින් එක් දක්ෂයෙකු හෝ පාර්ලිමේන්තුවට යවන්නට පෙළ ගැසෙමු. එය සාර්ථක කරගත හැක්කේ අපටමය. දැන්ම උත්සාහ කරන්න. ඔබ දන්නා සමාජය තුළ මේ සඳහා සැඟවුණු කුසලතා ඇති අය සොයන්න.
  • මෙහි දැක්වෙන නිර්ණායකයන් හැකිතාක් කියවා ඒ හා සැසඳෙන, රටට ආදරය කරන, ක්‍රියාවෙන් ප‍්‍රතිඵල ගෙන ආ හැකි, දක්ෂ, සුවිශේෂ බුද්ධිමතෙකු ඔබ දන්නේ නම්, ඔබේ එම නාම යෝජනාව ඉතා බුද්ධිමත්ව හා වගකීමෙන් එවන්න. නැතහොත් ඔබ අප අතරින් මෙතෙක් යෝජනා වී ඇති නම් හොඳින් පිරික්සා, පසු විපරම් කර, හැකිතාක් තොරතුරු සොයා, ඔබේ කැමැත්ත ඒ තෝරාගත් නම්වලට, ඔබේ මුහුණු පොතින් යොදන්න. . එම නම් අතරින් ඔබ සුදුසුයැයි සිතන ඕනෑම නම් ප‍්‍රමාණයකටද (225 දක්වා) කැමැත්ත පළ කළහැක. නමුත් එය ඉතා වගකීමෙන් හා බුද්ධිමත්ව සිදුකිරීම ඔබේ වගකීමයි. ඒ අනුව ඔබේ වැඩිම කැමැත්ත දැක්වෙන යෝජිතයින්, මෙහි සඳහන් නිර්ණායක හා සහතික වශයෙන්ම සැසඳෙන්නේ නම්, ඒ තේරී පත්වුණු, සුවිශේෂ දක්ෂතා ඇති බුද්ධිමතුන් එක්රැස්කර, අප රට වෙනුවෙන් දක්ෂ බුද්ධිමතුන්ගේ පක්ෂයක් ගොඩනැංවෙනු ඇත. එම බුද්ධිමතුන්ගෙන් සපිරි පක්ෂය මෙවර පාර්ලිමේන්තුවට දිස්ත්‍රික් මට්ටමින් තරඟකරනු ඇත. ඒ අනුව ඔබේ මෙම තීරණය, රටේ සහ අප දරුවන්ගේ අනාගතය තීරණය කිරීමට විශාල ලෙස දායක වනු ඇත.
  • මෙවර පාර්ලිමේන්තුවට දක්ෂයින් 225ක්ම යැවීමට හැකිවේයැයි අපි නොකියමු. එමෙන්ම, රටේ ආණ්ඩුබලය ගැනීමට අපට හැකිවේයයිද නොසිතමු. නමුත් අපට හැකිතාක් දක්ෂයින්ගෙන්, බුද්ධිමතුන්ගෙන්, මහත්වරුන්ගෙන්, රටට ආදරය කරන්නන්ගෙන්, පාර්ලිමේන්තුව පිරවිය හැකිවනු ඇතැයි අප උදක්ම විශ්වාස කරමු. එයමද රටේ අනාගතයට යහපතක්ම වනු ඇත. එවිට අන්තවාදී කණ්ඩායම් ඉදිරියේ දණ නැවීමට අවශ්‍ය නොවනු ඇත. පිබිදෙන ඉන්දියාවක් මෙන්, ශක්තිමත් රුසියාවක් මෙන්, දියුණු සිංගප්පූරුවක් මෙන්, අප රටද දියුණු කිරීමේ මගකට පිවිසෙමු. ඊට දේශ හිතෛශී නායකයින් අවශ්‍ය වේ. රටට ජනතාවට වංචාකරන මන්ත්‍රීවරුන් වෙනුවට, අවංක, අප දන්නා තරමින් විශ්වාසය තැබියහැකි, ක්‍රියාවෙන් ප‍්‍රතිඵල ගෙනෙන, දක්ෂ බුද්ධිමතුන් සොයා ඔවුන් පාර්ලිමේන්තුවට යවමු. අප තවමත් ප‍්‍රමාද නැත. දැයේ දු දරුවන්ට සුන්දර සුරක්ෂිත රටක් ගොඩනැගීමට අදම ක්‍රියාත්මක වන්න. මෙම පණිවුඩය රටට ආදරය කරන බුද්ධිමත් සැම වෙත යවන්න.
  • එමෙන්ම නුදුරේදීම මීට එරෙහි තර්ජන බලවේග බොහෝ ක්‍රියාත්මක වනු ඇත. අප රැකීමට ධනවතුන් බලවතුන් නැත. නමුත් ඒ සියල්ලට වඩා ඔබ අපගේ ජනබලය ප‍්‍රබල වනු ඇත.

    - රටට ආදරය කරන බුද්ධිමතුන්